في الاردن بيسموا “التونة” ب “طُنّ” . المهم قبل حوالي اسبوعين كنا قاعدين انا والشباب في الشغل وبدنا نوكل وجبنا تونة أو “طن” ، فواحد من الشباب بيسأل هل التونة مفيدة زي السمك الطارج ؟؟ فأنا بقله اتوقع مفيد ﻷنه سمك. فنط واحد من الشباب وقال لأ التونة مش سمك !!!. سألته ولا شو ؟ لحم بقر يعني . فقال الزميل العزيز: ال”طن” بيستخرجوه من جسم الحوت وهو ليس لحم الحوت ، بيجيبو الحوت اللي وزنه أكثر من “طن” وبيستخرجو منه هالجزء ، علشان هيك سموه “طن” ..
على هالرشة بيصيدو الحوت ولو لاقو وزنه أقل من طن بيرجعوه للبحر
المعلومة الثانية:
الدنماركييون بيعبدو البقر. أنا فكرت انه الزميل العزيز “بدون ذكر أسماء” بيمزح ولا هو بيحكي عن جد ومصر على رأيه . شكله تأثر بدعايات لورباك 0